Стол тенниси юлдузлари: Олимпия ўйинларида омади юришмаган кўп карра жаҳон чемпиони Владимир Самсонов

Владимир Самсонов 1976 йилнинг 17 апрелида Беларусь пойтахти Минск шаҳрида дунёга келади. Стол теннис билан олти ёшидан бошлаб шуғулланиб келади. У стол теннисидаги дастлабки ютуғига 1987 йил Афинада кадетлар ўртасида Европа чемпионатида эришади. Ўша мусобақада бўлажак стол тенниси юлдузи Собиқ Иттифоқ терма жамоаси таркибида олтин медалларни қўлга киритган.

 Катталар ўртасида Жаҳон чемпионатида 1995 ва 1997 йилда кумуш медални қўлга киритади. Шунингдек, бир неча бора жаҳон кубоги ва Европа чемпионатида олтин медални қўлга киритган. Владимир фаолияти давомида 27 та “ITTF World Tour”  мусобақасида зафар қучган, шунингдек, у бешта қитъанинг барчасида ғалаба қозонган ягона пинг-понг устаси ҳисобланади.

Жаҳон ва Европа биринчиликларида кўплаб медалларни қўлга киритган Самсонов олтита Олимпия ўйинларида иштирок этган ва ҳеч бирида медални қўлга кирита олмаган.