Султонов "Челленжер" турнирини қийин ғалаба билан бошлади

Ҳамюртимиз Италиянинг Барлетта шаҳрида ўтказилаётган турнирда иштирок этмоқда. Ушбу "Челленжер" туркумига кирувчи мусобақанинг мукофот жамғармаси 91 250 еврони ташкил қилади. Турнирда 8-рақам остида таснифланган Ҳумоюн илк даврада украиналик Олександр Овчаренкога қарши кортга чиқди. 

Икки соату 27 дақиқа давом этган уч сетлик мураккаб баҳсда Султонов рақибини камбэк эвазига мағлубиятга учрата олди - 2/6, 7/6(3), 7/5. Ҳумоюн учрашув давомида 3, Олександр 6 та эйс зарбасини амалга оширган. Қўшхатолар ҳамюртимизда кўпроқ бўлди - 4 га 3. Бу теннисчиларнинг ўзаро ўтказган илк учрашуви эди.    

Таққослаш учун, Султонов ATP рейтингида 229, Овчаренко эса 327-ўринни эгаллаб турибди. Энди теннисчимиз 1/8 финалда хорватиялик Матей Додигга қарши кортга чиқади. Ушбу баҳс бизнинг вақт билан эртага, 3 апрель куни соат 13:00да бошланади.