Султонов Монца турнирида дунёнинг 91-ракеткасига қарши уч сетлик учрашув ўтказди

Мукофот жамғармаси 145 250 еврони ташкил этувчи мусобақада ҳамюртимиз Ҳумоюн Султонов захира ўйинчиси сифатида баҳсларга киришганди. Мамлакатимизнинг биринчи ракеткаси илк даврада рейтингда ўзидан юқорида турган словакиялик 27 ёшли Лукас Клейнни 6/1, 6/3 ҳисобида мағлубиятга учратган эди. 

Ҳозиргина якунига етган 1/8 финал баҳсида ҳамюртимиз турнирнинг биринчи ракеткаси, дунё рейтингида 91-ўринни эгаллаб турган бельгиялик Рафаэль Коллиньонга қарши кортга чиқди. Биринчи сет 6/2 ҳисобида бельгиялик фойдасига ҳал бўлди. Иккинчи сетда Ҳумоюн брейк эвазига сетни ютиб олди - 6/4. Ҳал қилувчи учинчи сетда Султонов кучли рақибига қаршилик кўрсата олмади - 0/6.     

Таққослаш учун, Султонов ATP рейтингида 229-ўринни эгаллаб турибди. Бир соату 56 дақиқа давом этган баҳсда Ҳумоюн 3, Коллиньон 8 та эйс зарбасини амалга оширди. Қўшхатолар европалик теннисчида кўпроқ бўлди 4 га 2. Бу теннисчиларнинг ўзаро ўтказган учинчи учрашуви бўлди. Бундан аввалги икки баҳсда теннисчилар биттадан ғалабага эришишганди. Бугун Рафаэль ҳисобда олдинга чиқиб олди - 2:1.