Суперлига. Бугун АГМК - "Навбаҳор" ва яна иккита ўйин бор

Coca Cola Суперлига. 12-тур

ҚИЗИЛҚУМ — СЎҒДИЁНА
25 август 2020 йил. Тошкент. ТТЙМИ стадиони. 17:00 ("Спорт ТВ" LIVE)
Ҳакамлар: Илгиз Танташев, Хусниддин Шодмонов, Султонмурод Улфатов, Абдурашид Худойберганов
Назоратчи: Ғайрат Каримов
Комиссар: Зоҳиржон Акрамхонов

Иккинчи рестартни иккита ғалаба билан бошлаган "Қизилқум" олдинги иккита турда бир очко тўплаган "Сўғдиёна" билан беллашади. Агар Навоий клуби бугун ҳам ғалаба қозонса 2016 йилги кетма-кет учта ғалабали натижасини такрорлайди.

Ушбу жамоалар ҳозирга қадар 34 бор тўқнаш келишган. Шундан 16тасида "Қизилқум" ғолиб бўлган, 8та ўйинда "Сўғдиёна"нинг қўли баланд келган. Яна 10та учрашувда дуранг кузатилган.

Ўзаро ўйинларнинг охирги 4тасида "Сўғдиёна" бу жамоага умуман ютқазмаган - 1 ғалаба, 3 дуранг. Эътиборлиси "Қизилқум" мезбон бўлган 17та ўйиннинг ҳеч бирида "Сўғдиёна"га ютқазмаган экан.

АГМК — НАВБАҲОР
25 август 2020 йил. Тошкент. "Локомотив" стадиони. 19:00 ("Спорт ТВ" LIVE)
Ҳакамлар: Темур Тўхтасинов, Анвар Маражабов, Зиёдулла Абдураҳмонов, Санжар Назаров
Назоратчи: Рашид Айтеков
Комиссар: Жаҳонгир Раҳматуллаев

Суперлиганинг бу мавсумида ҳали мағлуб бўлмаган АГМК сўнгги икки турда ғалаба нималигини билмаган "Навбаҳор"га қарши ўйнайди. Агар бугунги ўйинда АГМК мағлуб бўлмаса, клуб ўзининг мағлубиятсиз серияли рекордини такрорлайди. Жамоанинг энг узун мағлубиятсиз серияси 2017 йилда қайд этилган ва у 12та ўйиндан иборат.

Мазкур клублар Ўзбекистон чемпионати доирасида 24 марта ўзаро ўйин ўтказишган. 11 бор АГМК, 7 бор "Навбаҳор" 3 очкони қўлга киритган. Қолган 6та учрашувда муроса кўчаси танланган.

Ўтган мавсумда "Навбаҳор" бу рақибни юта олмаган - 1 дуранг, 1 мағлубият. АГМК мезбонлигида ўтган охирги 2та учрашувда "Навбаҳор" мағлуб бўлмаган - 1 ғалаба, 1 дуранг.

СУРХОН — МЕТАЛЛУРГ ("Бунёдкор" стадиони)
25 август 2020 йил. Тошкент. "Бунёдкор" стадиони. 19:00 ("Маҳалла ТВ" LIVE)
Ҳакамлар: Шавкат Насибуллаев, Расул Фозилов, Максим Нехочин, Аҳамджон Эргашев
Назоратчи: Олег Дачев
Комиссар: Зоҳид Акромов

Иккинчи рестартда ҳали ғалаба қозонмаган клублар ўртасидаги баҳс. "Сурхон" охирги икки турда бир дуранг ва бир мағлубият қайд этган бўлса, "Металлург" икки учрашувда икки бор мағлуб бўлди.

Бу жамоалар бугунга қадар 16 бор ўзаро ўйин ўтказишган. 7 марта Бекобод клуби, 2 марта Термиз клубининг қўли баланд келган. Қолган 7та учрашувда ғолиб аниқланмаган.

Ўзаро охирги 3та ўйинда "Металлург" бу жамоага ютқазмаган - 2 ғалаба, 1 дуранг. "Сурхон" сўнгги бор 16 йил аввал, 2004 йилда "Металлург" устидан ғалабага эришган. "Сурхон" мезбонлиги остида 8 марта ўйин ўтказилган. Шундан 6тасида 1:1 ҳисоби қайд этилган. Яна икки учрашувда мезбонлар ғолиб бўлишган. Яъни Бекобод клуби "Сурхон" уйидан ҳеч қачон ғалаба билан қайтмаган.