Сузиш бўйича Ўзбекистон очиқ чемпионати якунланди

Эътиборлиси, мазкур нуфузли мусобақада Аргентинанинг Буэнос-Айрес шаҳрида ўтказиладиган III ёзги ўсмирлар Олимпия ўйинларига йўлланмалар ҳам ўйналди.

Халқаро сузиш федерацияси шафелигида ўтказилган турнирда мамлакатимиз спортчилари қаторида қўшни Қозоғистон ва Қирғизистондан ҳам спортчилар қатнашишди. Мусобақада 400 нафарга яқин спортчи совринли ўринлар ҳамда шу йилнинг 6-18 октябрь кунлари Аргентинанинг Буэнос-Айрес шаҳрида ўтказиладиган III ўсмирлар ёзги Олимпия ўйинлари йўлланмаси учун баҳс юритишди.

Қизғин кечган мусобақалар якунларига кўра бир йўла беш нафар ўзбекистонлик спортчи ўсмирлар ўртасидаги Олимпия ўйинларининг йўлланмалари учун “А” нормативини бажардилар.

Жумладан, 50 метр масафага брасс усулида сузишда Бибигул Миннебаева ва Алексей Сидорчук, 50 метр масофага баттерфляй усулида сузишда Мирсаид Мирзоитов, 50 метр масофага эркин усулда сузиш бўйича Наталья Критинина ҳамда Муҳаммаджон Абдужалилов муваффақиятли иштирок этиб, III ўсмирлар Олимпия ўйинларининг йўлланмаси учун “А” нормативини бажаришди.  

Яна бир маълумот. Сузиш бўйича Ўзбекистон қишки очиқ чемпионати доирасида халқаро ҳакамлар семинари ҳам ўтказилди. Мазкур семинарга Халқаро сузиш федерациясининг Янги Зеландия ва Беларусь давлатларидан таклиф этилган етакчи мутахассислари раҳбарлик қилишди.

Халқаро ҳакамлар семинарида Ўзбекистондан 14 нафар, шунингдек, Бирлашган Араб Амирликлари ва Индонезия давлатларидан ҳакамлар иштирок этиб, назарий ва амалий билимларини янада тоблаб олишди.

Икки кунлик семинар якунларига кўра, ҳакамларга Халқаро сузиш федерациясининг маҳсус сертификатлари берилади. Ушбу семинарда қатнашган ҳакамлар энди халқаро мусобақаларда ҳакамлик қилишлари мумкин бўлади.