Тажрибали велоспортчи Ольга Забелинская спортчилик фаолиятини якунлади

"Ўзбекистон велоспорт миллий терма жамоаси аъзоси, кўплаб халқаро турнирлар ғолиби, Олимпия ўйинлари совриндори Ольга Забелинская профессионал спортчилик фаолиятини якунлади. Шу муносабат билан велоспорт федерациясида тадбир ташкил этилди. Унда федерация раҳбарияти, мураббийлар ва ёш спортчилар иштирок этди. 

Ольга Забелинская ўз фаолиятини эсга оларкан, ёш спортчиларга ўрнак бўладиган жиҳатларни санаб ўтди. Шу ўринда, умидли спортчиларимиз ҳам ўзларини қизиқтирган саволларга тажрибали велопойгачидан жавоб олишди. Тадбир сўнгида мутасаддилар собиқ спортчимизга қўлга киритилган натижалар ҳамда терма жамоа билан босиб ўтилган йўл учун миннатдорлик билдиришди. 

Маълумот учун, Ольга Забелинская 2018 йилдан бошлаб Ўзбекистон терма жамоаси шарафини ҳимоя қилиб келаётган эди", дейилади ташкилот хабарида.