"Тарихий натижа учун мукофот йўқ" — қозоғистонлик шахматчи норозилик билдирди

Самарқандда ўтказилган Олимпиадада Қозоғистон аёллар терма жамоаси бирорта ҳам учрашувда мағлуб бўлмай, 18 очко билан 2-ўринни эгаллаган. Бироқ мусобақа Қозоғистонда давлат мукофоти тўланадиган турнирлар рўйхатига киритилмаган.

Нурман Қозоғистонга қайтгач, Олмаота шаҳри Жисмоний тарбия ва спорт бошқармаси ходимларидан бу ҳақда билганини айтди.

"Қозоғистонга қайтиб келганимиздан сўнг, Олмаота шаҳри Жисмоний тарбия ва спорт бошқармаси ходимлари бу ютуғимиз учун бизга давлат мукофоти тўланмаслигини айтишганида жуда ҳайрон қолдим. Бунинг устига, Олимпиададаги натижамиз бизга ҳар ой бериладиган давлат тўловларини олиш ҳуқуқини ҳам бермас экан. Сабаби — Бутунжаҳон Шахмат Олимпиадаси натижалари бўйича мукофот пули тўланадиган давлат мусобақалари рўйхатига киритилмаган экан", — деди спортчи.

Шахматчи спорт мутасаддиларига мурожаат қилиб, дунёнинг етакчи мамлакатлари қатнашадиган ва шахматчилар учун асосий жамоавий мусобақалардан бири ҳисобланган Олимпиада нима сабабдан тегишли давлат рўйхатига киритилмаганини сўради.

"Ва энг муҳими — бу вазиятни қандай ўнглаш ҳамда Бутунжаҳон Шахмат Олимпиадасини тегишли рўйхатга киритиш мумкин?" — дейди Нурман.

46-Бутунжаҳон Шахмат Олимпиадаси 16–27 сентябрь кунлари Самарқанд шаҳрида бўлиб ўтди. Қозоғистон аёллар терма жамоаси 18 очко билан кумуш медални қўлга киритди. Ўзбекистон эркаклар терма жамоаси эса Олимпиадада чемпион бўлди. Жамоа аъзолари президент Шавкат Мирзиёев томонидан фахрий унвонлар билан тақдирланди. Шунингдек, уларга президент совғаси сифатида Volkswagen автомобили, коттеж уйлар ва 200 минг доллардан пул мукофоти топширилди.