“Tashkent Open XII”. Ниғматов мағлубиятсиз одимламоқда, 4-турда у гроссмейстерни енгди

Мусобақада 12 мамлакатдан келган шахматчилар ғолиблик йўлида ўзаро рақобатлашишяпти. Ўз тарихида ўн иккинчи бор ўтказилаётган халқаро турнирнинг соврин жамғармаси 20 000 АҚШ долларини ташкил қилади. Ғолиб шахматчи 3 000 долларга эга бўлади. 

Беларуслик халқаро гроссмейстер Кирил Ступак (2556) турнирнинг биринчи рақамли шахматчиси ҳисобланади. Кеча тўртинчи тур учрашувлари ўтказилди. Ўтган йилги турнирда иккинчи ўринни эгаллаган Ступак 4-турда ўзи сингари 3 очкога эга бўлиб турган ҳамюртимиз Саидакбар Сайидалиевни мағлубиятга учратди. 

Мағлубиятсиз одимлаётган ёш шахматчимиз Ортиқ Ниғматов кетма-кет тўртинчи ғалабасига эришди. Бу сафар у халқаро гроссмейстер мусобақанинг тўртинчи тартиб рақамли шахматчиси Жаҳонгир Воҳидов (2546)дан устун келди. 

Яна бир ёш шахматчимиз Никита Хорошев оқ доналарда ҳамюртимиз Нодирбек Ёқуббоев билан муросага келди. Турнир жадвалида Ступак ва Ниғматов 4тадан очко жамғариб, қўшҳокимлик қилишяпти. Бугун 5-турда айнан икки пешқадам ўзаро тўқнаш келади. Ҳамюртларимиздан Никита Хорошев ва Нодирбек Ёқуббоевда 3,5тадан очко бор.