Ташкил топганига кўп бўлмаган "Бургут" хоккей клуби атрофида ҳавотирли миш-мишлар тарқалмоқда

Бу ҳақда Қозоғистоннинг shaiba.kz нашри хабар бермоқда.

Жамоа ташкил этилганидан кўп ўтмай, ўз олдига қўйган мақсадларини эълон қилди. Янги клубнинг Телеграм-каналида трансферлар ҳақида мунтазам хабарлар берила бошланди.

19 май куни "Бургут" жамоа тарихидаги илк бош мураббий - таниқли Александ Висоцкий тайинланганини маълум қилди.

Афтидан, ҳаммаси жойидадек кўринади, бироқ бир қанча шов-шувли шартномалардан сўнг клуб расмий манбалари бирданига жим бўлиб қолди. Яқинда бўлиб ўтган Қозоғистон чемпионати хоккей клублари раҳбарларининг йиғилишида эса "Бургут" янги аъзо сифатида таништирилмаган. Қолаверса, Қозоғистон кубоги формати ҳам номаълумлигича қолмоқда.

Шунингдек, Александр Висоцкий билан шартнома имзолангани расман эълон қилинганига қарамай, тошкентликлар ўз тарихидаги илк мавсумни бошқа мураббий бошчилигида бошлаши мумкин. Бу Петропавловскдан таклиф этилган Галим Мамбеталиев бўлиши мумкин.

Баъзи манбалар клуб ҳали умуман молиялаштирилмаганини ҳам айтмоқда.

"Ҳумо" хоккей клубининг матбуот хизмати раҳбари Александр Малишев эса бу вазиятга муносабат билдирар экан, клуб Ўзбекистон хоккей федерациясида рўйхатдан ўтмагани ва шу сабабли ҳеч қандай мусобақаларда иштирок эта олмаслигини, уларнинг "Алпомиш" муз саройидан фойдалинишини ва йиғин 8 июль куни Олма-Ота шаҳрида бошланишини айтиб ўтди.