Тайсон Фьюри Жошуа билан жангни ташкил қилаётгани учун бир инсонга раҳмат айтди

Тайсон Фьюри UFC ва Zuffa Boxing промоушенлари раҳбари Дана Уайтга ҳамюрти Энтони Жошуа билан жангни ташкил этишдаги роли учун ошкора миннатдорлик билдирди.

"Унутмасимдан олдин, ушбу жангни ташкил қилаётгани, Netflix билан келишувга эришгани ва ишни охирига етказгани учун Дана Уайтга раҳмат айтмоқчиман, — деди Фьюри ижтимоий тармоқларга жойлаган видеосида. — Ажойиб иш. Эдди Хирн эса бунга ҳеч қандай алоқаси йўқлигини тан олишга журъати етмайдиган майда ҳасадгўй. Аммо мен эркак сифатида, Эдди ва бошқалар йиллар давомида уриниб, уддалай олмаган улуғвор ишни амалга оширган бошқа бир эркакка ҳурмат бажо келтирмасдан иложим йўқ. Катта раҳмат, Дана, сен ҳақиқий афсонасан. Менинг назаримда, дунёдаги энг яхши промоутерлардан бири ва шунчаки ажойиб инсон".

"Аммо ҳозирча жанг ҳали расман тасдиқлангани йўқ, — дея қўшимча қилди Фьюри. — Бу қўрқоқлар ҳали ҳам қочиб юрибди, Эдди эса ҳамон сафсата сотмоқда".

Эслатиб ўтамиз, Фьюри ва Жошуа ўртасидаги жанг бўйича музокаралар уни америкалик телетомошабинлар учун қулай бўлиши мақсадида Лондондан Нью-Йоркка кўчириш зарурати туғилганда берк кўчага кириб қолди. Жошуанинг манфаатларини ҳимоя қилувчи промоутер Эдди Хирн шу муносабат билан қўшимча талаблар қўя бошлади, хусусан, АҚШда қўшимча солиқлар тўлаш зарурати туфайли гонорарни оширишни талаб қилди. Шу билан бирга, у Жошуа Лондондаги "Уэмбли" стадионида ҳеч қандай шартларсиз жанг қилишга тайёрлигини таъкидлаган эди.

Душанба куни Эдди Хирн Фьюрининг вакили бўлган ҳамкасби Фрэнк Уоррендан олган ултиматум муддати тугайди. Агар томонлар шу вақтгача келишувга эриша олмасалар, Фьюри янги рақиб излашни бошлайди ва барибир 20 ноябрь куни Нью-Йоркда жанг ўтказади.