Тел-Авив "Катта Дубулға" турнирида ТОП-8`дан жой олдик

Мусобақада дунёнинг 60 давлатидан жами 418 нафар дзюдочи турнир медаллари ҳамда Токио Олимпиадаси йўлидаги муҳим рейтинг очколари учун татамига чиқди. Улар қаторида Ўзбекистон терма жамоасининг 11 нафар аъзоси ҳам ўз имконияти ва маҳоратини синовдан ўтказди. Илк бор IJF мусобақасида иштирок этган ёш дзюдочиларимиз Жалолиддин Бойназаров ва Шоҳруҳ Бахтиёров учун Тель-Авив татамилари катта имтихон бўлди. Айтиш мумкинки, бу йигитлар ўзларидан ёмон таассурот қолдиришмади. Уларнинг ҳар иккиси ҳам турнирда ғалаба ҳиссини туя олишди ва ўз ҳисобларига мос равишда 120 ҳамда 160 рейтинг очколарини қўшиб қўйишди. 

Умумий иштирокимизга келсак, терма жамоамиз Исроил турнирида 1 та олтин, 2 та бронза медали билан якунда умумжамоа ҳисобида 60 давлат орасида 8-ўринни банд этди. Бу яхши натижа. Шарофиддин Болтабоев олтин медаль ва 1000 рейтинг очкосига эга бўлди. Ушбу натижаси эвазига у ТОП-10 рейтингга кириб олади. -66 кг вазн тоифасидаги беллашувларда юртимиз шарафини ҳимоя қилган Сардор Нуриллаев ва Муҳриддин Тиловов бронза медали ҳамда 500 рейтинг очкосини қўлга киритди. 

Бугун Ўзбекистон терма жамоаси делегацияси Истанбул - Тошкент рейси билан тунги соат 01:55да юртимизга қайтиб келади. Энди бор эътибор 5-7 март кунлари пойтахтимиздаги муҳташам "Ҳумо" арена саройида ўтказилувчи Тошкент "Катта Дубулға" турнирига тайёргарликка қаратилади. Бўлажак мусобақада Ўзбекистон терма жамоаси ҳар бир вазн тоифасида 4 нафардан дзюдочиси билан иштирок этади.