Теннисчиларга кўрсатиладиган ёрдам пуллари миқдори маълум қилинди. Рўйхатда ўзбекистонлик теннисчилар ҳам бор

ATP рейтинги яккалигида 101-500, жуфтликда 51-175-ўринларни эгаллаб турган теннисчиларга кўмак берилади. Яккалик теннисчиларига 8650 доллардан, жуфтлик рейтингидаги спортчиларга 4330 доллардан. 

Ўтган йили 250 минг доллардан кўп, ёки сўнгги тўрт йил ичида миллион доллардан кўп пул ишлаган, шунингдек дисквалификация қилинган теннисчиларга пул берилмайди. 

Маълумот учун, ўзбекистонлик эркак теннисчилар ичида Денис Истомин (156), Ҳумоюн Султонов (311) ва Санжар Файзиев (489) жаҳон рейтингида ТОП-500га киради. Қайд этиш лозим, ATP сўнгги маротаба рейтингини 16 март куни эълон қилган. 

WTA эса яккаликдаги аёл теннисчиларга 10400 АҚШ долларидан берадиган бўлди. Олдинги йилда 350 минг доллар, сўнгги тўрт йилда 1,4 миллион ва бутун фаолияти давомида 3,5 миллиондан ортиқ пул топган теннисчиларга молиявий кўмак берилмайди. Лекин хабарда айнан қайси ўринлардаги теннисчиларга бундай ёрдам кўрсатилиши айтилмаган. 

Маълумот ўрнида, ўзбекистонлик теннисчи қизлар ичида Сабина Шарипова (364) ва Акгуль Аманмурадова (407) кучли 500ликдан ўрин олган.