Теннисчиларимизнинг "Дэвис Кубоги" доирасидаги Босния ва Герцеговинага қарши ўйини яна ўша абгор кортда ўтказилади

Босния ва Герцеговина билан баҳс I Жаҳон гуруҳи учун плей-офф босқичи доирасида бўлиб ўтади.

Ўйинлар 31 январь — 1 февраль кунлари пойтахтимиздаги Республика Олимпия захиралари теннис мактаби ёпиқ кортларида ташкил этилади. Илк кунги учрашувлар соат 13:00да, 1 февралдагиси эса 11:00 да бошланади.

Ўзбекистон терма жамоаси ушбу қарама-қаршиликда ғалаба қозониш орқали яна I Жаҳон гуруҳига қайтиши мумкин.

Жамоалар шу кунгача ўзаро ўйин ўтказишмаган. Босния ва Герцеговина терма жамоаси сўнгги учрашувини ўтган йилнинг сентябрида I Жаҳон гуруҳи доирасида Хитой Тайпейига қарши ўтказиб, 2:3 ҳисобида имкониятни бой берган эди.

Маълумот учун, Ўзбекистон терма жамоаси "Дэвис Кубоги" рейтингида 287,5 очкога эга бўлган ҳолда 42-ўринни эгаллаб турибди. Босния ва Герцеговина эса рейтингда 30-ўринга жойлашган.

Эслатиб ўтамиз, Ўзбекистон теннис федерацияси 2023 йил АҚШга қарши ўйинларни ҳам шу кортда ўтказган ва танқид остига олинганди.