Тимурқулов онлайн шахмат мусобақасида бош совринни ўзиники қилди

Эътиборли тарафи шундаки, саккизинчи турда 10 имкониятдан 9 очко жамғариб бухоролик Анвар Жабборов ғолибликни қўлга киритган эди. Шу турда худди шунча очко жамғарган яна бир бухоролик ҳаваскор шахматчи Алибек Тимурқулов ҳам 10 имкониятдан 9 очко жамғарганди, аммо chess.com сайтининг Fair Play жамоаси қўшимча коэффициентларга кўра ғолибликни Анвар Жабборовга тақдим этган эди.

Куни кеча ўтказилган ҳаваскорлар ўртасидаги биринчи онлайн Ўзбекистон чемпионатининг тўққизинчи турнири бош совринини саккизинчи турнирда иккинчи ўринга муносиб кўрилган Тимурқулов Алибек Акмалович қўлга киритди.

Маълумот ўрнида таъкидлаш жоиз, шахмат бўйича ҳаваскорлар ўртасида биринчи онлайн Ўзбекистон чемпионати 11-20 май кунлари ўтказилиши режалаштирилган эди. Шу кунга қадар 9 та турнир ўз якунига етди ҳамда ҳар бир турнир ғолиби уч миллион сўм миқдоридаги пул мукофотини қўлга киритди.

Ҳаваскорлар ўртасидаги биринчи онлайн Ўзбекистон чемпионатининг сўнги турнири бугун бўлиб ўтади. Мазкур чемпионатнинг охирги кунида иштирок этинг ва ғолиб бўлинг!