Тоҳиржонова жаҳон чемпионати 1/4 финалининг иккинчи партиясини ўтказди ФОТО

Жаҳон чемпионатининг соврин жамғармаси 450 000 АҚШ долларини ташкил қилади ва ғолиб шахматчи 60 000 долларга эга бўлади. Ушбу жаҳон чемпионатида юртимиз шарафини ягона вакиламиз, аёллар ўртасида халқаро гроссмейстер Гулруҳбегим Тоҳиржонова муваффақиятли ҳимоя қиляпти. 

Ҳозиргина Гулруҳбегим чорак финал босқичининг иккинчи учрашувида амалдаги жаҳон чемпиони хитойлик Цзюй Вэньцзюнга қарши дона сурди. Ҳамюртимиз оқ доналарда ҳаракат қилди. Чин юрти вакиласи биринчи рақам остида таснифланган бўлиб, кеча у қора доналарда дуранг билан чекланганди. Агар бугун Тоҳиржонова ғалаба қозонса, ярим финалга йўл оларди. 

Афсуски, тажриба муҳим паллада ўз сўзини айтди. Саксон биринчи юришдан сўнг гроссмейстеримиз ўз мағлубиятини тан олди. Шунга қарамай, Гулруҳбегим Тоҳиржонованинг жаҳон чемпионатидаги иштирокини муваффақиятли дея баҳолаш мумкин. Сабаби, шу пайтгача ўзбекистонлик аёл шахматчилардан ҳеч бири жаҳон чемпионатининг ярим финал остонасига қадар етиб келмаган эди.