Токио-2020. Давлат Бобоновда медаль, боксчимизга эса ноҳақлик қилишди

Кун давомида Олимпиадада иштирок этган ўзбекистонлик спортчиларнинг иштирокларига оид маълумотларни ушбу саҳифада кузатиб бориш мумкин бўлди. 

Спортчиларимиз қуйидаги натижаларни қайд этишди:

Дзюдо: Гулноза Матниязова (иккинчи жангида мағлубият)

Дзюдо: Давлат Бобонов (БРОНЗА медали)

Бокс: Миразизбек Мирзахалилов (1/8 финалда мағлубият)

Бокс: Дилшод Рўзметов (1/8 финалда мағлубият)

Шу тариқа, кунлик онлайн матнли трансляция ўз якунига етди. 

16:41. Дилшодбек Рўзметов имкониятни 1:4 ҳисобида бой бериб қўйди. Афсус. У озарбайжонлик Альфонсо Домингесга ютқазди.

16:19. Бироздан сўнг Дилшодбек Рўзметовнинг жанги бошланади.

15:56 Эркаклар ўртасидаги -90 кг вазн тоифасида бронза медали учун баҳс якунига етди. Унда ҳамюртимиз Давлат Бобонов туркиялик Михаэл Зганк тўқнаш келди ва рақибини мағлуб этди

14:54. Бобонов энди бронза медали учун Туркия дзюдочиси Михаел Зганкка қарши баҳс юритади. Жанг Тошкент вақти билан тахминан 15:20 дан сўнг бошланади. 

14:26. Ғалаба! Бобонов Golden Score'нинг олтинчи дақиқасида ғалабага эришди! Энди у бронза учун курашади. 

14:06. Ниҳоят Давлат Бобонов иштирокидаги жанг бошланмоқда.

13:33. Ҳозирда аёллар ўртасидаги ўтиш ва ярим финал баҳслари ўтказилмоқда. Беллашувлар бироз чўзилмоқда. Яна битта жангдан кейин Бобоновнинг жанги бошланади.

13:18. Яна бироздан сўнг Давлат Бобоновнинг бронза медали учун ўтиш йўлидаги жанги бошланади. Тахминан 13:30 дан сўнг спортчимиз татамига чиқади. 

13:11. "Спорт" каналида дзюдо баҳсларининг трансляцияси бошланмоқда. Демак, ниҳоят Давлат Бобоновнинг жангини томоша қиламиз. 

11:11. Дзюдо. Бобонов жаҳон чемпионати финали учун реванш оладими?

10:35. Энди Бобонов бронза медали учун ўтиш жангида Испания шарафини ҳимоя қиладиган Николас Шеразадишвили билан беллашади. Ушбу баҳс Тошкент вақти билан тахминан 13:20 дан сўнг бошланади.

10:33. Давлат Бобонов чорак финалда икки карра жаҳон чемпиони ҳисобланган грузиялик Лаша Бешаурига ютқазиб қўйди. Энди у бронза учун курашади

9:44. Энди Давлат ярим финал йўлланмаси учун грузиялик Лаша Бекаурига қарши баҳс юритади. Мазкур жанг тахминан 10:15 дан сўнг бошланади.

9:42. Давлат Бобонов украиналик Кеджау Набалига қарши баҳсда ИППОН эвазига ғалаба қозонди!

9:23. Бироздан сўнг дзюдочимиз Давлатбек Бобонов иккинчи жангини ўтказади. Рақиб - украиналик Кеджау Набали.

9:05. Маълумот учун, Олимпия ўйинларида протест бериш мумкин эмас. Мазкур қоида фақат AIBA шафеълигида ўтказиладиган мусобақаларда амал қилади. 

8:53. Кутилмаган хабар: Ҳакамлар -57 кг вазнли боксчимиз Миразизбек Мирзахалиловни очиқчасига "чопишди". Боксчимиз жангда яққол устунликка эришганди. Бироқ, ҳакамлар нима учундир ирландиялик боксчининг ғалабасини қайд этишди...

8:28. Бироздан сўнг Миразизбек Мирзахалиловнинг ирландиялик Энтони Уолкерга қарши жанги бошланади. Соат 8:35 дан бошлаб томоша қиламиз.

8:15. Гулноза Матниязова нидерландиялик рақибасига иппон эвазига ютқазиб қўйди. Афсус.

8:12. Бобоновга келаси босқичда украиналик Кеджау Набали рақиблик қилади. Ушбу баҳс Тошкент вақти билан тахминан 9:00дан сўнг бошланади.

8:05. Бироздан сўнг Гулноза Матниязованинг нидерландиялик Санне Дижкега қарши баҳси бошланади. Маълумот учун, бўлажак рақиб - жаҳон чемпионати совриндори ҳисобланади. 

7:56. Дзюдо. Давлатбек Бобонов италиялик Николас Мунгаини мағлуб этди ва иккинчи босқичга йўл олди! У 26-сонияда олинган вазари баҳоси эвазига баҳсни ўз фойдасига ҳал қилди.

7:39. Давлат Бобонов иштирокидаги жанг кутилганидан олдинроқ бошланмоқда. Спортчимиз илк беллашувни италиялик Николас Мунгаига қарши ўтказади.

7:14. Гулноза Матниязова энди иккинчи баҳсда нидерландия вакиласи Санне Дижкега қарши татамига чиқади. Ушбу баҳс Тошкент вақти билан тахминан 8:30дан сўнг бошланади.

7:03. Дзюдочимиз Гулноза Матниязова Чад Республикаси вакили Демос Мемнелумни сониялар ичида мағлубиятга учратди!

06:48. Ассалому алайкум ҳурматли спорт ишқибозлари. Ўзбек спортчиларининг Олимпия ўйинларидаги иштирокига бағишланган матнли трансляциямизни бошлаймиз. 

28 июль куни Олимпиадада қатнашадиган ўзбекистонлик спортчилар:

7:00 - Дзюдо: Гулноза Матниязова

8:15 - Дзюдо: Давлат Бобонов

8:35 - Бокс: Миразизбек Мирзахалилов

16:25 - Бокс: Дилшод Рўзметов

Соатлар Тошкент вақти билан кўрсатилган

Постер муаллифи: Мухтасар Умарова