"Токио-2020" спорт иншоотлари + ФОТО

Токио шаҳри чегарасида 33 та олимпия иншоотлари жойлашган, уларнинг 20 таси Олимпия қишлоғидан 8 километрдан узоқ бўлмаган масофада жойлашган. “Токио-2020” спорт иншоотларининг асосий қисми икки – “Мерос зонаси” ва “Токио кўрфази зонаси” кластерларида мужассамлаштирилган.

“Мерос зонаси”га янги Миллий стадиондан ташқари 10 та спорт иншоотлари киради. Уларда енгил атлетика, бадминтон, бокс, дзюдо, каратэ, от спорти, замонавий бешкураш, стол тенниси, оғир атлетика, гандбол ва футбол бўйича мусобақалар бўлиб ўтади. Бу ерда, шунингдек велосипед спорти бўйича шосседа пойгалар ўтказилади. “Мерос зонаси”нинг деярли барча спорт объектлари Япония пойтахтида 1964 йилда бўлиб ўтган Ёзги Олимпия ўйинлари учун қурилган эди. Улар “Токио-2020” учун реконструкция қилинди ва янгиланди.

“Токио кўрфази зонаси” кластери спортнинг 18 тури, шу жумладан кураш, гимнастика, сузиш, камондан отиш, теннис, қиличбозлик, волейбол, академик эшкак эшиш, байдарка и каноэда эшкак эшиш мусобақаларига мўлжалланган иншоотларни қамраб олади. Ушбу кластерга кирадиган 15 та спорт иншоотидан тўққизтаси махсус “Токио-2020” Олимпия ва Паралимпия ўйинлари учун бунёд этилган.

“Токио кўрфази зонаси”даги Харуми оролида Олимпия қишлоғининг турар жойларида спортчилар яшайди. “Токио-2020” Олимпия ўйинлари тугаганидан кейин Олимпия қишлоғи замонавий турар жой массивига айланади.

“Токио-2020” Олимпия ўйинлари дастуридаги футбол ўйинлари Япониянинг етти – Токио, Саппоро, Рифу (Мияги префектураси), Касима (Ибараки префектураси), Сайтама ва Йокогама шаҳарларидаги стадионларда бўлиб ўтади. Мияги ва Ибараки префектураларидаги стадионларда футбол ўйинларини ўтказиш “Токио-2020” Олимпия ўйинлари 2011 йилда Шарқий Япониядаги зилзила ва цунами бўлиб ўтган ана шу префектураларни ҳам қамраб олганини намойиш этиши мақсадини кўзлайди.