Токио "Катта Дубулға" турнирида мезбонлар 14 та олтиндан 13 тасини бегона қилишмади

Икки кунлик мусобақада дунёнинг 5 қитъаси 44 давлатидан келган жами 274 (149 эркак, 125 аёл) нафар дзюдочи медаллар учун татамига чиқди. Юртимиз шарафини биргина вакилимиз Музаффарбек Тўрабоев ҳимоя қилди. Париж-2024 Олимпиадаси совриндори ўзи учун янги вазнда имкониятини синаб кўрди. +100 кг вазнда курашган Тўрабоев илк даврадаёқ япониялик дзюдочи Канта Наганога имкониятни бой бериб қўйди.  

Эътиборлиси шундаки, Япония терма жамоаси 14 та вазн тоифасидан 13 тасида олтин медалларни қўлга киритди. Биргина -100 кг вазнда Матвей Каниковский чемпионлик шоҳсупасига кўтарилди. IJF байроғи остида курашган россиялик спортчи финалда италиялик Женнаро Пиреллини мағлубиятга учратди. Қолган барча вазнларда мезбонлар ғалаба нашидасини суришди.