Тўлқин Қиличев Баҳодир Жалоловнинг жангига бормаганлиги ҳақида: «Олимпиада чемпионига нима ўргатиш мумкин»

Мураббий Тўлқин Қиличев якунланган Ўзбекистон чемпионати ва Баҳодир Жалоловнинг жангига нима сабабдан бормаганлиги ҳақида гапирди.

«Аввало, якунланган Ўзбекистон чемпионати ҳақида гаписам, ўзбек бокси тарихида илк бор халқаро ҳакамлар жангларни баҳолаб борди. Улар юртимиздаги бокс муҳитини кўриб ҳайрон бўлишди. Бу пайтгача бунақасини кўрмаганмиз деб, хурсанд бўлиб кетишди. Республика биринчилигини якунлаб, янги бир мусобақага шай турибмиз. Асосий жангда Исроил Мадримов ҳаммамизни хурсанд қилади деб ўйлайман. Ишонаманки, йигитларнинг барчаси юзимизни ёруғ қилади. Бундай даражадаги катта бокс оқшомларига мезбонлик қилишдан асосий мақсад ҳам боксчиларимизнинг ишончли ғалабага эришиб тезроқ чемпионлик камарлари томон қадам ташлашларидир.

Баҳодир Жалолов билан нега Дубайга бормадим? Ўзбекистон чемпионатида янги номларни кашф этиш, ёшларни саралаш учун Баҳодирнинг жангига бормадим. Раҳматжон акамни жўнатдим. Раҳматжон Рўзиохунов жуда тажрибали мураббий. Баҳодирга бу жангда катта эътибор шарт эмас деб ўйладим. Чунки Жалолов Олимпиада чемпиони. Олимпиада чемпионига нима ўргатиш мумкин? Керакли кўрсатмани айтиб турсангиз, ҳаммасини ўзи уддалайди деган фикрда Раҳматжон акам бордилар ва шукурки, улар ғалаба қозонишди. Бугунги жангда барча боксчиларимизга омад тилайман», - деди Тўлқин Қиличев.