Ўн йил ютқазмаган чемпион Немков ватандошидан мағлуб бўлди

PFL Returns to Dubai оқшомининг асосий жанги кутилмаган натижа билан якунига етди. Россиялик оғир вазн тоифаси вакиллари иштирокида кечган чемпионлик жангида 10 йил давомида ютқазмай келган Вадим Немков даъвогар ватандоши Сергей Билостеннийга ҳакамларнинг якдил қарори (46-49, 47-48, 47-48) билан имкониятни бой бериб қўйди.

Шу тариқа, Сергей Билостенний PFLнинг янги чемпионига айланди. Сергей 2015 йилнинг июнь ойида профессионал фаолиятини бошлаган. Ҳозирда Билостеннийнинг профессионал рекорди 16 та ғалабани ўз ичига олади, улардан 10 таси нокаут орқали эришилган, ҳисобида тўртта мағлубият бор.

Сўнгги бор Немков 2016 йилнинг апрель ойида мағлубият аламини тотиб кўрганди. Ўшанда у Япониянинг Сайтама шаҳрида ўтган RIZIN FF 1 турнирида швециялик Карл Альбректссонга имкониятни бой берган эди. Кечагиси билан қўшиб ҳисоблаганда Вадимнинг ММА фаолиятидаги мағлубиятлари 3 тага етди. Унинг профессионал рекордида ҳозирда 20 та ғалаба, учта мағлубият бор, яна битта жанг бекор қилинган. У Bellatorнинг яримоғир вазн тоифасидаги собиқ чемпиони ва жанговар самбо бўйича беш карра Россия чемпиони ҳисобланади. Вадим Райан Бейдер, Кори Андерсон, Йоэль Ромеро, Фил Дэвис ва бошқа кўплаб номдор жангчиларни мағлуб этган.