Тўлқин Қиличев нима учун терма жамоа билан Жаҳон чемпионатига бормаяпти?

Бугун Orient Finance Bank бош офисида ушбу Жаҳон биринчилигида иштирок этадиган терма жамоамиз вакиллари иштирокида матбуот анжумани бўлиб ўтди. Тадбирда мусобақада қатнашадиган терма жамоамиз аъзолари ва мураббийлар рўйхати расман маълум қилинди.

Мурраббийлар рўйхатидан терма жамоа катта мураббийи Тўлқин Қиличев ўрин олмаганини ва Жаҳон чемпионатига бормаётганини кўришимиз мумкин. 

Ўзбекистон бокс федерацияси бош котиби Муроджон Мамадалиев бу ҳолатга аниқлик киритди.

«Хабарингиз бор, келаси йилнинг январь ойида Тошкент шаҳрида 22 ёшгача бўлган боксчилар ўртасида Осиё чемпионати бўлиб ўтади. Ҳозирги вақтда биз параллель тарзда Марат Галиевич бошчилигида ушбу Осиё чемпионатига ҳам тайёргарлик кўряпмиз. 22 ёшлиларнинг тайёргарлигига жавобгар шахс сифатида Тўлқин Қиличев юртимизда қолади ва боксчиларимиз билан ўқув-йиғин машғулотини олиб боради. Шу сабабли Қиличев Жаҳон чемпионатига бормайди».