Том Аспиналл UFC чемпионлик камаридан воз кечиши мумкин

"Дўстим ва спарринг шеригим Анте Делия ҳозирда Топ-10`ликка кирди. Катта эҳтимол билан у 2-3 та жанг ўтказганидан кейин чемпионлик камари учун даъвогарга айланади. Агар мен ҳеч қачон чемпион бўлмаганимда, биз жанг қилишимиз кераклигини ҳис этган бўлардим, чунки бу менинг орзуим. Аммо ҳозир, бунга эришганимдан сўнг, мен камардан шунчаки воз кечган бўлардим. Лекин у билан ҳеч нарса учун, ҳар қандай катта пул учун ҳам жанг қилмайман. У менинг дўстим. Мен учун пул ва унвонлардан ҳам муҳимроқ нарсалар бор. Мен аллақачон камарни қўлга киритдим, буни амалга оширдим ва у бу даражага етиб келгунига қадар яна бир нечта жанг ўтказишга улгураман", - деди британиялик ShxtsnGigs подкастида.

Оғир вазн тоифасида PFL Гран-приси ғолиби Анте Делия сентябрь ойида дунёнинг энг кучли лигасида дебютини муваффақиятли ўтказиб, биринчи раунддаёқ польшалик Марчин Тибурани нокаутга учратди. Хорватиялик 35 ёшли аралаш яккакураш устаси ўзининг навбатдаги жангини 1 ноябрь куни дивизион рейтингида олтинчи ўринда бораётган америкалик Валдо Кортес-Акостага қарши ўтказади.

Том Аспиналл эса икки ҳафтадан сўнг Абу-Дабидаги UFC 321 турнирида рейтинг пешқадами франциялик Сирил Гандан чемпионлик камарини ҳимоя қилади. Бу оқшомнинг асосий жанги бўлади.