Тому Торини табриклаймиз!

Ўзбекистон ва Япония давлатлари ўртасидаги дўстона алоқалар спорт соҳасида ҳам изчил давом этмоқда. Жумладан, дзюдо ватани Япониядан келган тажрибали мутахассис, дунёга машҳур Кодокан мактаби тарбияланувчиси, халқаро йўриқчи (инструктор) Тому Тори ҳам ана шу ҳамкорлик доирасида қарийб ярим йилдан бери юртимизда фаолият юритмоқда. Кунчиқар юрт мураббийи фаолияти давомида орттирган тажрибасини барча ёш тоифасидаги терма жамоаларимиз аъзоларига улашмоқда.    

- Ўзбекистонга илк бор 2002 йили келгандим. Ўшанда спортчи эдим. Ҳозир эса мураббий сифатида юртингизда бўлиб турибман. Таассуротларим кутганимдан ҳам аъло. Ўзбекистон дзюдоси барча даврларда қитъа ва жаҳонда ўз ўрнига эга бўлган. Дунёда ҳам ўзбекистонлик дзюдочиларга алоҳида ҳурмат билан қарашади. Олимпиада ва жаҳон чемпионатларида дзюдочиларингиз медаллар учун даъвогарлар қаторида эътироф этилади. Мен бу ерга Ўзбекистон дзюдоси ривожига ёрдам бериш учун келганман. Ўйлайманки, бу миссияни шараф билан уддалайман. Кодокан мактабида олган билимларим, спортчилик фаолиятим давомида орттирган тажрибаларимни маҳаллий ёшларга улашаман, - дейди бугунги кун қаҳрамони.  

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби ва дзюдочилар номидан Тому Торини бугунги таваллуд айёми билан муборакбод этамиз.