Тўққизинчи Олимпиада йўлида. Чусовитина Жаҳон кубогининг финалига йўл олди

Ушбу нуфузли мусобақада ўзбек спортининг тирик афсонаси, саккизта Олимпиадада қатнашган тарихдаги ягона гимнастикачи Оксана Чусовитина бошчилигидаги 6 нафар гимнастикачимиз юртимиз шарафини ҳимоя қиляпти.  

Қувонарлиси, 46 ёшли гимнастикачимиз таяниб сакраш мусобақасининг саралаш баҳсларида энг яхши учинчи натижани қайд этиб, финал йўлланмасини қўлга киритди. Оксананинг машқи ҳакамлар томонидан 12.949 баллга баҳоланди. 

Россиялик 17 ёшга ҳали тўлмаган Виктория Листунова 13.466 балл билан саралаш турнири ғолиби сифатида финал чиптасини қўлга киритди. Венгриялик Мария Ченге Бачкай 13.033 балл билан иккинчи поғонадан жой олди. Бу гимнастикачилар Оксана Чусовитина Олимпиадада медаль олган пайтда ҳали дунёга келишмаган эди.    

Маълумот учун, Доҳадаги Жаҳон кубогида Чусовитинадан ташқари Расулжон Абдураҳимов, Ҳабибуллоҳ Эргашев, Ўткирбек Жўраев, Абдулла Азимов ва Гулназ Жумабекова ҳам иштирок этяпти.