Тўрт теннисчимиз Қозоғистондаги турнирнинг 1/8 финалига чиқди

Мукофот жамғармаси 15 000 АҚШ долларини ташкил этувчи ушбу мусобақада тўрт нафар теннисчимиз ҳам ўз имкониятини синаб кўряпти. Қизиғи, уларнинг бари биринчи даврадан муваффақиятли ўтиб олишди. 

Ўзбекистоннинг иккинчи ракеткаси Сергей Фомин россиялик Борис Покотиловни 6/0, 6/2 ҳисобида таслим этди. Турнирда учинчи рақам остида таснифланган Фомин ATP рейтингида 615, Покотилов 981-ўринни эгаллаб турибди. 

Амир Милушев россиялик Иван Зайцевдан 3/6, 6/3, 6/4 ҳисобида устун келди. Рейтингга киритилмаган ёш теннисчимиз Раҳимбек Иброҳимов ҳиндистонлик Нитин Кумар тўсиғидан ўтиб олди. Биринчи сетни 2/6 ҳисобида бой берган Синҳа Кумар иккинчи сетга чиқа олмади.  

Рейтингнинг 1156-поғонасида бораётган Максим Шин турнирнинг бешинчи ракеткаси, дунё рейтингида 671-ўриндан жой олган россиялик Евгений Филипповни 4/6, 7/6(5), 6/4 ҳисобида мағлубиятга учрата олди.