Тўрт теннисчимиздан фақат бир нафари Қозоғистондаги турнирнинг 1/4 финалига етиб келди

Мукофот жамғармаси 15 000 АҚШ долларини ташкил этувчи ушбу мусобақада тўрт нафар теннисчимиз ҳам ўз имкониятини синаб кўраётганди. Уларнинг бари биринчи даврадан муваффақиятли ўтиб олишганди. 

Афсуски, чорак финалга улардан биргина Сергей Фомин йўл олди. Ўзбекистоннинг иккинчи ракеткаси илк даврада россиялик Борис Покотиловни 6/0, 6/2 ҳисобида таслим этганди. Турнирда учинчи рақам остида таснифланган Фомин иккинчи босқичда яна бир рус теннисчиси Руслан Тюкаевдан устун келди - 3/6, 6/3, 6/3. 

Амир Милушев турнирнинг еттинчи ракеткаси, россиялик Максим Жуковга 0/6, 0/6, Рейтингга кирмаган ёш теннисчимиз Раҳимбек Иброҳимов япониялик Шинжи Ҳазавага 2/6, 4/6, Максим Шин эса яна бир Кунчиқар юрт вакили Казума Кавачига 3/6, 6/0, 2/6 ҳисобида имкониятни бой бериб, мусобақадаги иштирокини якунлади. 

ATP рейтингида 615-ўринни эгаллаб турган Сергей Фомин бугун ярим финал чиптаси учун россиялик Иван Денисовга қарши кортга чиқади. Бу теннисчи рейтингнинг 1123-поғонасидан жой олган.