Тошкент 2026 йилги Бутунжаҳон шахмат олимпиадаси мезбонлиги учун курашади

Шубҳасиз, бундай йирик мусобақани қабул қилиш ҳар қандай мамлакатга ҳам насиб этавермайди. Бутунжаҳон шахмат федерацияси (ФИДЕ) президенти маслаҳатчиси Берег Балгабаев билан мазкур мавзу муҳокамасига бағишланган учрашув ташкил қилинди. МОҚда бўлиб ўтган расмий тадбирда Қўмита раиси Рустам Шоабдураҳмонов, Жисмоний тарбия ва спорт вазирининг биринчи ўринбосари Равшан Ирматов ҳамда МОҚ Бош котиби Ойбек Касимов иштирок этди.

“Муҳтарам Президентимиз бошчилигида юртимизда спорт тарғиботи бўйича катта ишлар олиб борилмоқда. Жумладан, 2025 йил Тошкентда Осиё ўйинларини қабул қилиш ва уни юқори савияда ўтказиш бўйича тегишли топшириқлар берилди. Айниқса, юртимиз аҳолиси орасида спортга бўлган қизиқишни ошириш учун Тошкентда халқаро мусобақаларни имкон қадар кўпроқ ўтказишга эътибор қаратилган. Бутунжаҳон шахмат Олимпиадасини Ўзбекистонда ўтказиш ғоясини ҳукуматимиз қўллаб-қувватлашига ишонаман. Шахсан мен тадбирларга тарихий Самарқанд шаҳрини яхши номзод деб кўрсатган бўлар эдим”, – деди МОҚ раиси.

Шунингдек, суҳбат давомида 2026 йилда Бутунжаҳон шахмат Олимпиадаси ва унинг доирасида ФИДЕ Конгрессини ҳам Ўзбекистонда ўтказиш бўйича музокара олиб борилди. Ўз навбатида МОҚ ҳамда Жисмоний тарбия ва спорт вазирлиги мутасаддилари ФИДЕ билан чуқур ҳамкорликни йўлга қўйишдан мамнун эканликларини билдирдилар. Таъкидлаш жоиз, мартабали меҳмон бугун кун давомида пойтахтимиздаги Халқаро шахмат академиясига ҳам ташриф буюриб, у ердаги шарт-шароитлар билан яқиндан танишди.