Тошкент вилоятида спорт беллашувлари авжида

Хусусан, Тошкент вилояти жисмоний тарбия ва спорт бошқармаси томонидан вилоятнинг шаҳар ва туманларидаги спорт мактабларида, жисмоний тарбия ва спорт бўлимларида, умумий ўрта таълим мактабларида бешта муҳим ташаббуснинг иккинчи ташаббуси ижроси бўйича спорт тадбирлари, беллашувлари ўтказилмоқда. 

Жумладан, 17 февраль куни Қибрай туманидаги умумий ўрта таълим мактабларида футбол, шахмат ва “Қувноқ стартлар” мусобақалари ташкил этилди. 200 нафарга яқин ўғил-қизлар иштирок этган ушбу мусобақада кучли учликдан жой олган ўқувчилар диплом ва эсдалик совғалари билан мукофотланишди. 

Зангиота туманидаги 32-умумий ўрта таълим мактабида туман жисмоний тарбия ва спорт бўлими ва халқ таълими бўлими ҳамда вилоят жисмоний тарбия ва спорт бошқармаси тассаруфидаги БЎСМ билан ҳамкорликда баскетбол бўйича 7-9 синф ўқувчилари ўртасида баскетбол бўйича туман очиқ биринчилиги бўлиб ўтди. Қизиқарли тарзда ўтган мусобақанинг якунида ғолиб жамоалар муносиб тақдирланишди. 

Шунингдек, 13-19 февраль кунлари Тошкент вилояти жисмоний тарбия ва спорт бошқармаси бошлиғи соврини учун 2004 йилда туғилган ва ундан кичик ёшдаги қизлар ўртасида вилоят биринчилиги ўтказилди. 

Волейбол спорт турини ёшлар орасида оммавийлигини таъминлаш, иқтидорли спортчиларни саралаш ва вилоят терма жамоаларини шакллантириш мақсадида ташкиллаштирилган мусобақанинг, дастлаб, жойларда ҳудудий босқичлари ўтказилиб, вилоят финалига йўлланма олган жамоалар 19 февраль куни Юқоричирчиқ туманида ўзаро куч синашишди. Якунда ихтисослаштирилган болалар-ўсмирлар спорт мактаби жамоаси ғолибликни тантана қилишди. Иккинчи ўринни Бекобод шаҳар жамоаси эгаллаган бўлса, учинчи ўрин қуйичирчиқлик қизларга насиб этди. 

Бугун, 20 февраль куни эса Олмалиқ шаҳрида вилоят жисмоний тарбия ва спорт бошқармаси ҳамда Олмалиқ шаҳар жисмоний тарбия ва спорт бўлими, Олмалиқ шаҳар болалар-ўсмирлар спорт мактаби ва вилоят бокс федерацияси ҳамкорлигида бокс бўйича 2004-2005 йилда туғилган ёшлар ўртасида мусобақа бўлиб ўтди. Мусобақада Тошкент шаҳри,  Жиззах, Тошкент вилоятларидан 150 нафарга яқин спортчилар иштирок этиб, бор маҳоратларини намойиш этишди. 

Эътиборлиси, мусобақага бокс бўйича халқаро беллашувларнинг ғолиб спортчиларидан Жаҳонгир Раҳмонов, В. Шин, Азизбек Озодбеков, Абдумалик Халаковлар ташриф буюришди. 

Таъкидлаш жоиз, жорий йилнинг 6-10 февраль кунлари бокс бўйича Колумбия  давлатида ўтган халқаро мусобақада Ж. Раҳмонов барча рақибларини енгиб, олтин медалга сазавор бўлган. А. Халаков эса мазкур мусобақада бронза медалини қўлга киритиб, шоҳсупадан жой олган эди. 

Мусобақа доирасида ушбу боксчилар Тошкент вилояти ҳокимлиги томонидан таъсис этилган қимматбаҳо совғаларга эга бўлишди. Совғаларни вилоят жисмоний тарбия ва спорт бошқармаси бошлиғи Комилжон Адилов топширди. 

Илҳом РАҲМОНОВ тайёрлади