Тошкентда бадиий гимнастика бўйича халқаро мусобақа старт олди

Ўзбекистон Миллий олимпия қўмитаси ва Ёшлар иттифоқи спорт маркази ҳамкорлигида ташкил қилинган турнирда мамлакатимиз спортчилари билан бир қаторда Россия, Сингапур, Исроил, Ҳиндистон, Қирғизистон, Қозоғистон ҳамда Бирлашган Араб Амирликлари мамлакатларидан гимнастикачилар иштирок этишмоқда.

Байрам муносабати билан пойтахтимизга бадиий гимнастика бўйича тўққиз карра жаҳон чемпиони, бугунги кунда Сингапур терма жамоасида бош мураббий сифатида фаолият олиб бораётган Бьянка Панова, шунингдек, асли ўзбекистонлик халқаро тоифадаги спорт устаси, бугунги кунда Исроил терма жамоаси гимнастикачиларига устозлик қилаётган Венера Зариповалар ҳам ташриф буюрганлар.

Бугун мусобақанинг очилиш маросими бўлиб ўтди. Унда Миллий олимпия қўмитаси Бош котиби Жасур Матчанов, Ўзбекистон Республикаси Жисмоний тарбия ва спорт вазири ўринбосари Шарифжон Мўминжонов ҳам иштирок этишди ва мусобақа иштирокчиларига омад тилашди.

Шунингдек, бугуннинг ўзида мусобақанинг дастлабки ғолиб ва совриндорлари номи маълум бўлди. Эртага ниҳоясига етадиган халқаро турнирга Ўзбекистон гимнастика федерациясининг «Универсал» спорт мажмуаси мезбонлик қилмоқда.