Тошкентда биринчи маротаба Марказий Осиё триатлон ассоциациясининг йиғилиши бўлиб ўтди

Таъкидлаш жоизки, CATA доирасидаги учрашув Ўзбекистонда биринчи маротаба бўлиб ўтди.

Учрашувда Ўзбекистон Триатлон Федерацияси раиси Отабек Умаров, CATA президенти Галимжан Эсенов, CATA вице-президентлари Чингиз Алканов ва Фаррух Носиров, CATA бош котиби Максим Крят ва CATA ижрочи котиби Айнагул Такеева иштирок этди.

CATA ва миллий триатлон федерациялари раҳбарлари Марказий Осиёда триатлонни ривожлантириш бўйича ҳамкорлик ва ҳаракатлар билан боғлиқ бир қатор муҳим масалаларни муҳокама қилдилар.

Томонлар ташкилот доирасида қўмиталар таркибини ташкил этиш тўғрисида ўзаро фикр алмашдилар ва бир қатор қарорлар қабул қилдилар. Жумладан, миллий триатлон федерацияларининг қуйидаги вакиллари қўмиталарнинг раҳбарлари этиб сайландилар:

CATA Медиа қўмитасининг раҳбари – Валихан Тен, Олмаота Триатлон Федерацияси Васийлик кенгаши аъзоси;
CATA Юридик қўмитаси раҳбари – Жасур Таджиев, Ўзбекистон Триатлон Федерациясининг Халқаро алоқалар департаменти директори;
CATA Спорт қўмитаси раҳбари – Канат Келсинбеков, Қирғизистон Триатлон Федерацияси вице-президенти;
CATA Паратриатлон қўмитаси раҳбари – Eлена Лижина, Қирғизистон Триатлон Федерацияси бош котиби.
Шунингдек, иштирокчилар Чимкент – Тошкент йўналишидаги биринчи халқаро мусобақа ўтказиш бўйича режаларни муҳокама қилдилар. Ушбу тарихий старт 2020 йил 3 май куни ўтказилиши белгиланди. Пойганинг асосий хусусияти шундаки, у трансмиллий бўлади, яъни Чимкентда сузиш босқичидан бошланади, ундан кейин спортчилар Чимкентдан Ўзбекистон пойтахтига масофани велосипедда босиб ўтадилар ва пойга Тошкент кўчалари бўйлаб югуриш билан якунланади.

Яна бир муҳим жиҳат – триатлон бўйича Марказий Осиё чемпионатини Оъзбекистон ҳудудида ўтказиш имкониятлари муҳокама қилинди. Бундан ташқари, ТEМИРАДАМ мусобақаларини Ўзбекистон Республикаси ва Қирғизистон Республикасида ҳам ўтказиш тўғрисида қарор қабул қилинди. Шунингдек, федерациялар раҳбарлари ҳамкорликда қўшма ўқув-машғулотлар йиғинларини ўтказишга келишиб олишди.

Минтақада паратриатлонни ривожлантириш режаларига алоҳида эътибор қаратилди. Қирғизистон Триатлон федерацияси паратриатлон бўйича биринчи халқаро стартни ўтказиш истагини билдирди.

Учрашув якунларига кўра турли ёшдаги спортчиларнинг тайёргарлигини ошириш мақсадида Ўзбекистон Триатлон Федерацияси раиси Отабек Умаров, Қозоғистон Триатлон Федерацияси вице-президенти Галимжан Есенов ва Қирғизистон Триатлон Федерацияси президенти Чингиз Алканов Марказий Осиё мамлакатларининг миллий триатлон федерациялари ўртасида умумий мусобақаларни ўтказиш бўйича ҳамкорлик Меморандумини имзоладилар.

Меморандум доирасида томонлар келгуси йил учун Марказий Осиёда мусобақаларнинг умумий тақвимини тасдиқлаш, қўшма мусобақаларда ҳар бир мамлакат спортчиларининг минимал ва максимал сонини белгилаш, шунингдек, маълум миқдордаги ва барча Марказий Осиё давлатлари иштирокида қўшма мусобақаларни ўтказиш бўйича ҳамкорлик қилишни келишиб олдилар.

Ўзбекистон Триатлон Федерацияси Матбуот хизмати