Тошкентда Жаҳон кубоги саралаши бошланди, Қосимжонов ҳам шу ерда ФОТОГАЛЕРЕЯ

Мусобақа олдидан нуфузли турнирнинг тантанали очилиш маросими бўлиб ўтди. Турнирда ҳамюртларимиз билан бирга Қозоғистон, Қирғизистон, Тожикистон ва Афғонистондан ташриф буюрган 50 нафарга яқин шахматчи иштирок этмоқда.

Саралаш турнирида Жаҳон чемпиони, Ўзбекистон фахри Рустам Қосимжоновнинг ҳам қатнашаётганлиги эътиборга молик ҳолат. 

Шунингдек, Нодирбек Ёқуббоев, Нодирбек Абдусатторов, Шамсиддин Воҳидов, Жавоҳир Синдоров, Гулруҳбегим Тоҳиржонова, Сарвиноз Қурбонбоева, Баҳора Абдусатторова, Нилуфар Ёқуббоева каби маҳоратли шахматчиларимиз ҳам Жаҳон кубоги учун бериладиган йўлланмани қўлга киритиш мақсадида дона сурмоқда.

Биринчи турда 15 шахматчи ғалаба нашидасини сурди. Ғолиб бўлганларнинг 6 нафари ҳамюртларимиз эканлиги қувонарли. Рустам Қосимжонов, Жаҳонгир Воҳидов, Ортиқ Ниғматов, Гулруҳбегим Тоҳиржонова, Нилуфар Ёқуббоева, Баҳора Абдусатторовалар рақибларини мот қилишга эришдилар.

Бугун саралаш баҳсларида 2 та тур бўлиб ўтади. Бири эрталаб соат 09:00 да бошланди, кейингиси соат 15:00 да старт олади.

Жаҳон кубогининг саралаш босқичи 29 майга қадар давом этади.

Алимурод Мамадаминов олган суратлар