Тошкентда мукофот жамғармаси 12 000 евролик шахмат фестивали ўтказилади

Унда Марказий Осиё давлатлари, жумладан Қозоғистон, Қирғизистон, Тожикистон, Туркманистон, Афғонистон ҳамда Ўзбекистондан энг кучли шахматчилар ғолиблик учун дона суришади.

Ўзбекистон шахмат федерацияси матбуот хизматининг хабар беришича, мукофот жамғармаси 12 000 евро бўлган ушбу мусобақа шахматчилар учун рейтингли экани билан ҳам аҳамиятлидир. Мусобақа Низомига кўра ўғил болалар ўртасида чемпионликни қўлга киритадиган шахматчига 3 000 евро, қизлар ўртасидаги баҳсларнинг мутлақ чемпионига эса 1 500 евро миқдорида мукофот пули белгиланган.

ФИДE, РосАТОМ ҳамда Ўзбекистон шахмат федерацияси ҳамкорлигида ўтказилаётган ушбу мусобақада 20 ёшгача бўлган ҳамда рейтинги ўғил болалар учун 1 800 ва қизлар учун 1 600 балдан кам бўлмаган шахматчилар қатнашиш учун ариза беришлари мумкин.

Тўққиз турдан иборат баҳсларда ҳар бир иштирокчига партия охиригача 90 дақиқа вақт берилади.