Тошкентда нуфузли шахмат турнири кутилмаган натижалар билан бошланди (1-турнинг барча натижалари)

Мукофот жамғармаси 75 000 АҚШ долларини ташкил қилувчи турнир швейцарча тизимда 10 турдан иборат бўлади. Иштирокчилар икки гуруҳда совринли ўринлар учун баҳс олиб боришади. Асосий ҳисобланган А гуруҳида 1800 ва ундан юқори рейтингли шахматчилар жам бўлган. В гуруҳида эса рейтинги 1999 ва ундан паст бўлган иштирокчилар дона суради. 

Кучлилар жам бўлган А гуруҳида ҳиндистонлик халқаро гроссмейстер Ниҳал Сарин (2687) биринчи рақам остида сараланган. У 1-турда ҳамюртимиз Беҳруз Умаров (2218)дан устун келди. Иккинчи рақамли шахматчи сифатида таснифланган ёш гроссмейстеримиз Шамсиддин Воҳидов (2670) кутилмаганда яна бир вакилимиз Азамат Дауриметов (2199) билан дуранг ўйнайди.    

Гроссмейстеримиз Муҳиддин Мадаминов (2550) ҳиндистонлик Сирин Каляни (2142)ни енгди. Биринчи турда Алмас Раҳматуллаев, Абдумалик Абдусалимов, Ортиқ Ниғматов, Сайидакбар Сайдалиев, Ҳумоюн Бегмуратов, Муҳаммадзоҳид Суяров сингари етакчи шахматчиларимиз ғалаба қозонишди.