Тошкентда Ўзбекистон олий лига чемпионати старт олди

Айлана тарзда ўтказиладиган эркаклар ўртасидаги мусобақада 5 нафар халқаро гроссмейстер - Нодирбек Абдусатторов (2550, чемпионатнинг биринчи рақамли иштирокчиси), Сайдали Йўлдошев (2469), Марат Жумаев (2451), Алексей Барсов (2411) ва Тохир Воҳидов (2400) дона суряпти. 

Биринчи турда Тохир Воҳидов ва Сайдали Йўлдошев ўзаро учрашувда дурангга имзо чекишди. Акмал Файзуллаев ва Улуғбек Тиллаев партиясида ҳам ғолиб номи аниқланмади. Нодирбек Абдусатторов қора доналарда ўйнашига қарамай, Элбек Жумановни мағлуб этди. Марат Жумаев қора доналарда ҳаракат қилиб, Нодирбек Ёқуббоевни енгди. 

Хотин-қиз шахматчилар мусобақасида икки нафар халқаро гроссмейстер - Гулруҳбегим Тохиржонова (2349, чемпионатнинг биринчи рақамли иштирокчиси) ва Сарвиноз Қурбонбоева (2219) иштирок этмоқда. Халқаро мастерлар - Ирина Геворгян (2273), ўтган йилги чемпион Нодира Нодиржонова (2179), Севара Боймуродова (2142), Баҳора Абдусатторова (2082) ҳам ғолиблик учун асосий даъвогарлар қаторида эътироф этиляпти.

Биринчи турда Гулруҳбегим Тоҳиржонова қора доналарда ўйнаб, амадаги чемпион Нодира Нодиржоновани таслим этди. Сарвиноз Қурбонбоева ҳам илк турда ғалабага эришди. Баҳора Абдусатторова рақибаси Дониёровага имкониятни бой бериб қўйди.