Тошкентда шахмат бўйича Ғарбий Осиё чемпионати ўтказилмоқда

Баҳсларда қитъамизнинг 11 мамлакатидан 300 нафарга яқин ақл-идрок соҳиблари иштирок этмоқдалар. Чемпионат Халқаро шахмат федерацияси (FIDE) нинг расмий мусобақаси ҳисобланади, FIDE ҳамда Осиё шахмат федерацияси кўмагида Ўзбекистон шахмат федерацияси томонидан ташкил этилмоқда. Беллашувлар “International Hotel Uzbekistan”меҳмонхонасида бўлиб ўтмоқда. Шахматчилар мусобақа давомида классик, рапид ва блиц йўналишларида кураш олиб бормоқдалар.

Турнир давомида юртимиз шарафини Нодирбек Абдусатторов, Ҳумоюн Бегмуратов, Нодирбек Ёқуббоев, Абдималик Абдисалимов, Афрўза Ҳамдамова, Баҳора Абдусатторова, Ортиқ Нигматов, Умида Омонова ҳамда Олмос Раҳматуллаев каби шахматчиларимиз ҳимоя қилмоқдалар. Ҳозирча рапид бўйича беллашувлар якунланди. Унда ўзбекистонлик спортчилар 48 имкониятдан 33 та медаль жамғара олишди. Олтин медаллар сони ўнтани ташкил қилди.

Рапид йўналишида қуйидаги спортчиларимиз шоҳсупанинг энг юқори поғонасидан ўрин олдилар:

1) Шахзод Исламов (Қашқадарё) – 6 ёшгача бўлган ўғил болалар

2) Зайнура Абророва (Тошкент) – 6 ёшгача бўлган қизлар

3) Хумоюн Бегмуратов (Тошкент) – 8 ёшгача бўлган ўғил болалар

4) Шахзода Ҳасанова (Тошкент) – 8 ёшгача бўлган қизлар

5) Акобирхон Сайдалиев (Самарқанд) – 10 ёшгача бўлган ўғил болалар

6) Афруза Ҳамдамова (Самарқанд) – 10 ёшгача бўлган қизлар

7) Умида Омонова (Сурхондарё) – 12 ёшгача бўлган қизлар

8) Нодирбек Якуббоев (Хоразм) – 16 ёшгача бўлган ўғил болалар

9) Ситора Сапарова (Навоий) – 16 ёшгача бўлган қизлар

10) Шамсиддин Вохидов (Тошкент) – 20 ёшгача бўлган ўғил болалар.

Айни пайтда стандарт шахмат бўйича баҳслар давом этмоқда. Мусобақа 22 ноябрь куни якунланади.