Тошкентда теннис бўйича J200 туркумига кирувчи халқаро мусобақа бўлиб ўтди ФОТОГАЛЕРЕЯ

Пойтахтимиздаги Республика олимпия захиралари теннис мактаби кортларида ўтказилган "NBU CUP ITF JUNIORS J200" халқаро турнири 30 га яқин мамлакатнинг 100 нафардан зиёд 18 ёшгача бўлган иқтидорли ракетка усталарини жамлади.

Халқаро теннис федерацияси рейтингида кучлилар сафида бораётган маҳоратли спортчилар қатнашган беллашувларда 11 нафар ўғил ва 9 нафар қиз теннисчилари юртимиз шарафини ҳимоя қилди.

Тўққиз кунлик саралаш баҳслари натижасида ҳамюртларимиз Артур Ибрагимов ва Илья Игнатов жуфтлик мусобақаларининг ярим финалигача етиб боришди.

Ярим финал беллашувлари сарҳисобига кўра, ўғил болалар ўртасидаги финал мусобақасида нидерландиялик Абель Форгер ва россиялик Амирхамза Насрединов, қизлар ўртасида финалда эса Юлия Перапехина (Россия) ҳамда Дарья Егорова( Россия) баҳс олиб борадиган бўлишди.

Қизлар ўртасидаги жуфтлик баҳсларида россиялик Юлия Перапехина/Ксения Смирнова – Екатерина Агуреева/Дарья Егорова, ўғил болалар жўфтлигида Абель Форгер(Нидерландия)/Макс Стензер (Германия) - Артем Богомолов/Иван Гретецкий (Россия)лар бош соврин учун курашиш имкониятига эга чиқишди.

Мазкур "NBU CUP ITF JUNIORS J200" халқаро турнири ҳақиқий истеъдодларни кашф этиш майдони бўлди. Муросасиз баҳслар натижасида яккалик беллашувларда нидерландиялик Абель Форгер ва россиялик Юлия Парапехина ғолибликни тантана қилган бўлса, жуфтликлар ўртасида кечган мусобақада Юлия Перапехина/Ксения Смирнова ҳамда Артем Богомолов/Иван Гретецкий (Россия) муваффақиятга эришди.

Мусобақа ғолиб ва совриндорлари, энг яхши кўрсаткичга эришган теннисчилар ташкилотчилар томонидан муносиб тақдирланди.

Муаллиф - Алимурод Мамадаминов/olamsport.com