Тошкентда Улуғбек Ҳақбердиев, Бекзод Исадуллаев иштирокида проф бокс оқшоми ўтказилди ФОТОРЕПОРТАЖ

Бокс оқшоми кардидан анча тажрибали ҳисобланган Улуғбек Ҳақбердиев (12-0-0, 7 КО), Бекзод Исадуллаев (9-0-0, 8 КО), Шукуржон Раҳимов (6-0-0, 3 КО) сингари чарм қўлқоп усталаримиз иштирокидаги жанглар ўрин олганди. Бу эса бокс мухлисларининг қизиқишига сабаб бўлди. 

Номлари тилга олинган уччала боксчи ҳам ўз жангларини муддатидан аввал якунлашди. Шукуржон Раҳимов 6 раундга мўлжалланган жангда қозоғистонлик Багдат Уайдаевни 3-раундда техник нокаутга учратди. Айнан шу жанг оқшомнинг марказий жанги бўлди. 

Улуғбек Ҳақбердиев яна бир кўзга кўринган боксчимиз Анвар Туроповни 8 раундлик жангнинг 2-раундида техник нокаутга учратди ва ўзининг проф боксдаги 12-ғалабасини қўлга киритди. Унинг муддатидан аввал қозонган ғалабалари сони 7 тага етди. 

Аббосхон Йўлдошевга қарши жангдаги иштироки билан танилган Бекзод Исадуллаев эса хоразмлик Мақсадбек Матязовни биринчи раунддаёқ нокаут эвазига мағлубиятга учратди.  

Проф бокс оқшомидан жами 12 та жанг ўрин олган бўлиб, уларнинг 8 таси муддатидан аввал якунига етди. Қолган 4 та жанг ғолиби ҳакамларнинг қарорига кўра аниқланди. Акбаржон Асқаров Жаҳонгир Норматовни биринчи, Жавоҳирбек Фозилов Қобилжон Бобожоновни биринчи, Суннатилла Ўктамалиев Азизбек Рўзметовни иккинчи, Фарҳодбек Арабжонов Рустам Қодировни иккинчи, Муҳаммаднуриддин Кимсанбоев Асрор Маҳкамовни биринчи раунддаёқ муддатидан аввал мағлубиятга учратди.  

Ихтиёр Абдуқодиров Азизжон Арзиевни, Аҳмад Мамажонов Жамшид Худойбергановни, Шерзоджон Ҳабибов Жасур Аҳмаджоновни, Шаҳзод Сулаймонов Синдор Баҳриддиновни ҳакамлар қарорига кўра, очколар ҳисоби билан мағлуб этишди.