21 окт 09:11
Янгиликлар

Теннис

Тошкентдаги турнирда ўзини ёмон ҳис қилган Остапенко Люксембургда чемпион бўлди

Люксембургда ўтказилган BGL Luxembourg Open турнири латвиялик теннис маликаси Елена Остапенконинг триумфи билан якунланди.

WTA рейтингида 63-поғонани эгаллаб турган Остапенко финал учрашувида дунёнинг 26-ракеткаси, германиялик Юлия Гёргесга осонлик билан мағлуб этишнинг уддасидан чиқди - 6/4, 6/1.

Ҳал қилувчи финал учрашуви роппа-роса 1 соат давом этган. 22 ёшли Елена баҳс давомида 6, 30 яшар Юлия эса 4 та эйс зарбасини амалга оширди. BGL Luxembourg Open турниридаги муваффақиятли иштирок Остапенкога 280 рейтинг очкоси ҳамда 34 677 евро мукофот пулини тақдим этди.

Маълумот учун, Елена Остапенко яқинда пойтахтимизда ўтказилган "Тошкент Опен" турнирининг иккинчи даврасида жароҳат сабаб баҳсни якунига етказа олмаган эди. У сўнгги бор 2017 йилда бош соврин соҳибасига айланганди.