“Тур де Франс-2020” тақдири нима бўлади?

Анъанага мувофиқ, турнир ёз фаслининг ўртасида ўтказилади. Афсуски, коронавирус пандемиясининг бутун дунё бўйлаб кенг тарқалиши сабаб бу йилги мусобақанинг ўтиши сўроқ остида қолмоқда. 

Ташкилотчилар айни пайтда мазкур мусобақани қандай қилиб бўлмасин ўтказиб олиш бўйича бош қотиришмоқда. Регламентга кўра, бу йилги баҳслар 27 июнь – 19 июль кунлари орасида ўтиши белгиланган эди. Бутун дунёда карантин ҳолати жорий этилгани сабаб мусобақанинг бу йилги баҳслари ушбу кунда ўтиши деярли имконсиз. Шу боис ташкилотчилар уни кейинроққа кўчириш ҳақида ўйлашяпти. 

Европа нашрларининг хабар беришича, ташкилотчилар мусобақани қолдириш ҳақида сира ўйлашгани йўқ. Бу борада якуний қарор май ойида эълон қилиши кутилмоқда. 

Эслатиб ўтамиз, мусобақа бўлиб ўтадиган Франция мамлакатининг ўзида коронавирус инфекциясига чалинганларнинг ўзи 109 мингдан ошган бўлиб, уларнинг 13 мингдан зиёди ҳаётдан кўз юмган.