28 фев 12:39
Янгиликлар

Футбол

U-20 Осиё кубоги. Факт ва рақамлар

Эртага U-20 Осиё кубоги старт олади ва илгари Осиё U-19 чемпионати номи билан аталган мусобақа беш йиллик танаффусдан сўнг фаолиятини давом эттиради.

Қитъа турнири олдидан статистика ихлосмандларини турнирга оид баъзи фактлар билан таништириб ўтамиз.

Индонезия сари йўл

Турнирнинг энг яхши 4 та терма жамоаси жорий йил Индонезия мезбонлик қиладиган U-20 Жаҳон чемпионати йўлланмасини қўлга киритади. Агарда Индонезия ярим финалга қадар етиб борадиган бўлса, қўшимча йўлланма учун кураш олиб борилади.

Мусобақа ўтказиладиган иншоотлар

Учрашувлар икки шаҳарнинг тўрт стадионида ўтказилади, булар: "Бунёдкор", "ЖАР", "Локомотив" (барчаси — Тошкент) ва "Истиқлол" (Фарғона).

Метин ҳимоя

Эрон, Япония ва Саудия Арабистони терма жамоалари саралаш босқичи давомида ўз дахлсизлигини сақлаб қолишди. Аслида, Саудия саралаш гуруҳида мусобақа мезбони Ўзбекистонга 1:2 ҳисобида имкониятни бой берганди. Аммо мезбон жамоа иштирокидаги ҳар қандай натижа расман ҳисобдан чиқарилган.

Энг сермаҳсул жамоа

Япония саралаш босқичида энг кўп гол урган жамоага айланди. "Самурайлар" жами 22 марта рақиб дарвозасини ишғол қилган.

Тўхтатиб бўлмас жамоа

Иордания Шимолий Мариана ороллари дарвозасига жавобсиз 16 та гол уриб, саралаш босқичида битта ўйинда энг кўп тўп киритган жамоага айланди.

Саралаш босқичида олтитадан гол урган Эрон ва Жанубий Корея вакиллари Амир Иброҳимзода ва Ли Ён Жун финал босқичида иштирок этади. Бироқ улардан ҳам кўпроқ тўп киритган (9 та гол) япониялик Канта Чиба Ўзбекистондаги мусобақада иштирок этмайди.

"Гол машинаси"

Юқорида тилга олинган эронлик Амир Иброҳимзода саралаш босқичининг бир ўйинида энг кўп гол урган футболчи бўлди. Ҳужумчи Бруней устидан 8:0 ҳисобида ғалаба қозонилган баҳсда бешта тўп киритди.

Мунтазам гол урувчилар

Жанубий Корея футболчиси Ли Ён Жун, иорданиялик Абу Таха ва индонезиялик Раббани Тасним саралаш босқичининг ҳар бир учрашувида рақиб дарвозасини ишғол қилишга муваффақ бўлди.

Чемпионларга бой турнир

Саудия Арабистони мусобақанинг амалдаги чемпиони ҳисобланади. Шунингдек, чемпионлик учун курашаётган 16 жамоа орасида яна етти нафар собиқ титул эгалари мавжуд, булар — Хитой, Ироқ, Эрон, Япония, Жанубий Корея, Сурия ва Қатар.