Уч нафар спортчимиз "Мард ўғлон" давлат мукофоти соҳиби бўлишди

Ушбу мукофот мамлакатимизда амалга оширилаётган кенг кўламли ислоҳотларда фаоллик кўрсатиб, ўзининг билим ва иқтидори, интилувчанлиги ва ташаббускорлиги, ҳалол ва самарали меҳнати билан Ватанимиз тараққиётига муносиб ҳисса қўшиб келаётган, юксак маънавиятли, мустақил фикрловчи, қатъий ҳаётий позиция, кенг дунёқараш ва юқори салоҳиятга эга, халқ манфаати ва юрт истиқболи учун масъулиятни ўз зиммасига олишга қодир бўлган фидойи ва мард ўғлонларимизга тақдим этиб келинмоқда. 

Қувонарлиси, мукофотга лойиқ кўрилган 28 нафар ўғлон орасида дзюдо бўйича Ўзбекистон терма жамоаси етакчиси, жаҳон чемпионати совриндори, Тошкент давлат иқтисодиёт университетининг 3-босқич талабаси Шарофиддин Лутфуллаев ҳам бор. 

Шунингдек, шахмат бўйича Ўзбекистон терма жамоаси аъзоси, ёшлар ўртасида жаҳон чемпиони, "Ўзбекистон белгиси" кўкрак нишони соҳиби, Ўзбекистон Миллий университетининг 1-босқич талабаси Нодирбек Яқуббоев, сузиш бўйича миллий терма жамоа аъзоси, жаҳон кубогининг бронза медали совриндори Владислав Мустафин ҳам "Мард ўғлон" мукофотига лойиқ топилди.