Уч шахмат маликасида бир хил очко, ЖК йўлланмаси ҳамюртимизга насиб этди

Аёллар ўртасида ўтказилган мусобақанинг сўнгги тўққизинчи туридан сўнг уч нафар шахматчи бир хил очко жамғарди. Халқаро гроссмейстеримиз Гулруҳбегим Тоҳиржонова оқ доналарда қозоғистонлик Меруерт Камалиденовани мағлуб этди. Нилуфар Ёқуббоева қора доналарда ҳаракат қилишга қарамай, халқаро мастер Баҳора Абдусатторовани енгди. 

Сўнгги тур олдидан пешқадам бўлиб турган қозоғистонлик Бибисара Ассаубаева оқ доналарда ҳамюртимиз Сарвиноз Қурбонбоевага қарши ўйнади. Агар бу матчда Бибисара ғалаба қозонганида, Жаҳон кубогига йўлланмани айнан у қўлга киритарди. Сарвиноз эса бунга йўл қўймади. Учрашув дуранг натижа билан якунланди. 

Натижада бир йўла уч нафар шахматчи - Нилуфар Ёқуббоева, Гулруҳбегим Тоҳиржонова ва Бибисара Ассаубаева 7 тадан очко жамғаришди. Қўшимча кўрсаткичларга кўра Ёқуббоева биринчи ўринни эгаллади ҳамда Жаҳон кубоги йўлланмасини қўлга киритди. Гроссмейстеримиз Сарвиноз Қурбонбоевага раҳмат! 

Аёллар мусобақаси регламентига кўра Жаҳон кубоги йўлланмаси фақат саралаш турнири ғолибига тақдим этилади. Нилуфар Ёқуббоева 2020 йилнинг 21 сентябрь - 15 октябрь кунлари оралиғида Беларусь пойтахти Минск шаҳрида бўлиб ўтадиган Жаҳон кубогида нафақат Ўзбекистон, балки Марказий Осиё минтақаси шарафини ҳимоя қилади.