УЕФА Инфантинони тахтдан туширмоқчи, Анри эса футболчиларни уйғонишга чақирмоқда

2026 йилги Жаҳон чемпионати билан боғлиқ бир нечта можаролардан сўнг ФИФА босим остида қолмоқда. Бу ҳолат ташкилот раҳбари Жанни Инфантинонинг мундиални ўтказишга оид тижорий ҳуқуқларни FIFA Forward Enterprise (FFE) компанияси орқали сотиш таклифидан кейин янада кескинлашди.

"Менинг фикримча, ўйинчиларда ўзлари ўйлаганидан кўра кўпроқ куч бор. Агар улар ўзгаришларни хоҳлашса, бунга эриша оладилар, айниқса, бугунги кунда. Футболчилар истаса, тўлиқ ҳокимиятга эга бўлади ва баъзан, назаримда, улар бундан фойдаланишмайди ёки бунга эга эканликларини англашмайди.

АҚШда жуда яхши биласиз: ўйинчи бирор нарса қилмоқчи бўлса, лига унга қулоқ солади. Буни NBA’да кўргансиз. Буни NFL’да кўргансиз... Бироқ қайсидир паллада ўйинчиларга доим: "Боринг, томоша кўрсатинг, пулингизни олинг ва кетинг", деган муносабатда бўлишади", – дея французнинг сўзларини келтиради “The Guardian”.

Ўтган ҳафтада Европа футбол ассоциациялари иттифоқи (УЕФА) алоҳида баёнот бериб, FFE яратилиши ғояси қандай пайдо бўлгани бўйича мустақил ташқи текширув ўтказишни талаб қилди.

Бундан ташқари, УЕФА агар Инфантино ФИФАнинг бўлажак конгрессида ўз номзодини қайта сайланиш учун кўрсатса, қандай йўл тутишини маълум қилди. Ташкилот миллий ассоциацияларга муносиб муқобил номзод танловини тақдим этиш мақсадида ҳамкор конфедерациялар билан биргаликда ҳаракат қилиш ниятида эканини билдирди. УЕФАybyu фикрича, бундай муқобил номзод ҳалоллик, шаффофлик, изчил ривожланиш ва ҳақиқий институционал ислоҳотлар тамойилларига таяниши керак.