UFC Fight Night 286 турнирининг бонуслари кимларга насиб этди?

Улардан бири тадбирнинг хедлайнери (асосий юлдузи) Сонг Ядонгга насиб этди. У оқшомнинг марказий жангида Умар Нурмагомедовни шов-шувли тарзда нокаутга учратди.

Хитойлик жангчи барча учта ҳакамнинг баҳолаш варақаларига кўра биринчи раундни бой берган бўлса-да, иккинчи беш дақиқаликда россиялик рақибини қарши зарба билан эсанкиратиб қўйди ва партердаги зарбалар билан жангни якунлади. Шу тариқа, у UFC`нинг енгил вазн тоифасидаги чемпионлик камари учун асосий даъвогарлардан бирига айланди.

"Оқшомнинг энг яхши чиқиши" учун иккинчи бонусни ташкилотдаги дебютини ўтказган индонезиялик Билол Ҳасан қўлга киритди. У иккинчи раундда лиганинг яна бир янги аъзоси Нилсон Рохасни нокаутга учратди.

"Оқшомнинг энг яхши жанги" номинацияси ғолиблигига Це Лю ва Леви Родригес лойиқ деб топилди. Уларнинг жанги биринчи раунднинг 4-дақиқаси 26-сониясида хитойлик жангчининг нокаут эвазига ғалабаси билан якунланди. Мағлубиятга учраганига қарамай, бразилиялик жангчи ҳам 100 минг доллар мукофот олди.

Бундан ташқари, яна беш нафар жангчи муддатидан олдин эришган ғалабалари учун 25 минг доллардан мукофот олди. Улар: Дениз Гомес, Кай Асакура, Ри Цуруя, Франческо Нуцци ва Эктор Сантьяго. Рақибларини муддатидан олдин мағлуб этган Жулия Поластри ва Андре Лима эса вазн ўлчаш жараёнида муваффақиятсизликка учрагани учун бонуслардан маҳрум бўлишди.