UFC президенти Хамзат Чимаевнинг ким билан жанг қилишини айтди

Яримўрта вазнда UFC чемпионлик камари учун собиқ даъвогар Гилберт Бернс ушбу рўйхатда ягона жангчи эмас. Бу ҳақда BT Sport сайтига берган интервьюсида Дана Уайтнинг ўзи айтиб ўтди.

"Хамзат Гилберт Бернс ёки Висенте Луке билан жанг қилади. Айнан шу икки яккакураш устасидан бири Чимаевнинг кейинги рақиби бўлади. Биз бу жанг устида ишлаяпмиз", - деди UFC президенти.

Аввалроқ, Гилберт Бернс ҳам, Хамзат Чимаев ҳам ўзаро жанг қилишга тайёр эканликларини маълум қилишган эди. Бразилиялик Луке эса чеченистонликка қарши 9 апрель куни Бруклиндаги UFC 273 ёки 7 майга белгиланган Рио-де-Жанейродаги UFC 274 турнирида октагонга чиқишга розилик берган.

Маълумот учун, айни пайтда Гилберт Бернс ҳамда Висенте Луке UFC яримўрта вазнлилар рейтингида мос равишда иккинчи ва тўртинчи ўринларни эгаллаб туришибди. Хамзат Чимаев эса 11-поғонадан жой олган.