UFC рейтинги янгиланди: Богдан Гусков Топ-10`ни тарк этди

Жумладан, ўша турнир доирасида Энтони Эрнандес устидан қозонилган ғалабадан сўнг, Грегори Родригес ташкилотнинг ўрта вазн тоифаси мета-рейтингида уч поғона юқорилаб, ўнинчи поғонадан еттинчи ўринга кўтарилди.

Оқшомнинг асосий жангида бразилиялик рақибига ҳакамларнинг якдил қарори билан имкониятни бой берган америкалик Эрнандес эса дивизионнинг кучли ўнталигида еттинчи ўриндан тўққизинчи поғонага тушиб кетди.

Турнирнинг иккинчи муҳим жангида Сергей Спивакни ҳакамларнинг якдил қарори билан мағлуб этган бразилиялик оғир вазнли жангчи Витор Петрино ўн биринчи поғонадан саккизинчи ўринга кўтарилди. Молдовалик Спивак эса Топ-10`даги ўрнини йўқотиб, тўққизинчи ўриндан ўн учинчи поғонага пастлади.

Ғалабали сериясини давом эттирган нидерландиялик Рене де Риддер ярим оғир вазн тоифаси Топ-10`талигида дебют қилди. У Роман Долидзени техник нокаут эвазига мағлуб этгани ортидан рейтингнинг тўққизинчи поғонасига жойлашди. Ҳамюртимиз Богдан Гусков афсуски, кучли ўнталикдаги ўрнини йўқотди, уни Азамат Мурзаканов ўн биринчи поғонага суриб чиқарди.

Турнир доирасида Лерриян Дугласни техник нокаут билан мағлуб этган америкалик Жамалл Эммерс ташкилотнинг ярим енгил вазн тоифаси кучли 15 талигига кириб, рейтингнинг ўн тўртинчи поғонасини эгаллади. Жейла Чавесни муддатидан олдин ютган ватандоши Карли Жудис эса аёллар ўртасидаги энг енгил вазн тоифасида 15-ўринда дебют қилди.