Умар Нурмагомедов кечаги кутилмаган нокаутига илк бор изоҳ берди

Россиялик аралаш яккакураш устаси аҳволи ҳақида гапирди ҳамда хатоларни таҳлил қилиб, октагонга қайтишга ваъда берди.

"Менинг аҳволим яхши. Кўнгил сўраб ёзаётган барчага катта раҳмат. Хатоларим устида ишлайман ва кучли бўлиб қайтаман", — деб ёзди россиялик жангчи ижтимоий тармоқдаги саҳифасида.

Шанхайдаги UFC Fight Night 286 турнирининг марказий жангида Ядонг кўпчилик кутмаганда номдор рақибини иккинчи раундда нокаутга учратди. Нурмагомедов барча уч ҳакамнинг баҳолаш варақаларига кўра биринчи раундни ўз фойдасига ҳал қилган эди. Ҳал қилувчи вазиятдан бироз олдин эса, бошлар тўқнашуви натижасида Сонгнинг ўнг кўзи устида жиддий жароҳат (кесилиш) юзага келиб, юзи қонга беланганди.

Нурмагомедов шу пайтгача фаолиятида ҳеч қачон муддатидан олдин мағлуб бўлмаганди. Унинг фаолиятидаги ягона мағлубияти ўтган йилнинг бошида Мераб Двалишвилига қарши чемпионлик жангида қайд этилган ва ўшанда у ҳакамларнинг баҳсли қарори билан ютқазганди.

Кетма-кет иккинчи марта муддатидан олдин ғалаба қозонган хитойлик жангдан сўнг ўзининг навбатдаги рақиби сифатида Двалишвили ва Петр Ян ўртасидаги чемпионлик жанги ғолибини кўришни исташини айтди. Ушбу принципиал трилогия 24 октябрь куни Абу-Дабида бўлиб ўтадиган UFC 333 турнирида якунига етади.