Универсал жанг бўйича Ўзбекистон кубоги мусобақаси бошланди

Унда Тошкент шаҳри ва вилоятлардан ташриф буюрган 14 ёшдан 18 ёшгача ва ундан катта 500 нафардан ортиқ спортчи иштирок этади. LIGHT ва KLASSIK йўналишларда бўлиб ўтадиган беллашувларда спортчилар ўз ёш тоифаларига кўра 15 дан ортиқ вазнда ғолиблик учун кураш олиб боради.

Шу муносабат билан бугун пойтахтимиздаги “Универсал” спорт саройида мусобақанинг очилиш маросими бўлиб ўтди. Тадбир Ўзбекистон Республикаси Гендер тенгликни таъминлаш масалалари бўйича комиссияси томонидан Жисмоний тарбия ва спорт вазирлиги билан ҳамкорликда ташкил этилди. Тантанали очилиш маросимида сўзга чиққанлар ушбу спорт тури бўйича мусобақалар 20 йилдан бери ўтказиб келинаётган бўлса-да, қисқа давр мобайнида кўпчиликнинг севимли машғулотига айланганини алоҳида таъкидлашди. Шунингдек, Универсал жанг спорти инсонда матонат, чидамлилик ва чаққонлик каби хислатларни тарбиялаши тилга олинди.

Юртимиздан Универсал жанг бўйича тўрт карра жаҳон чемпиони Алишер Абдуллаев, икки карра жаҳон чемпиони Жамол Омонов, жаҳон чемпиони Бахтиёр Аҳмедов ҳамда жаҳон чемпионати совриндори Нодира Казакова каби номдор спортчилар етишиб чиққан.

Маълумот учун, ушбу мусобақа жорий йил 19-25 октябрь кунлари Украинанинг Винница шаҳрида бўлиб ўтадиган Жаҳон кубоги олдидан тайёргарлик жараёнини ўтаб беради.