Усик ўзининг камари учун кечган Итаума - Хргович жангига муносабат билдирди

Эслатиб ўтамиз, ушбу жангда украиналик боксчи томонидан бўшатилган IBF чемпионлик камари ўртага қўйилганди. Жанг британиялик 21 ёшли боксчининг кутилмаган мағлубияти билан якунланган эди. Лондонда рингга чиққан ва яққол фаворит ҳисобланган британиялик спортчи 34 ёшли хорватиялик рақибига тўққизинчи раундда техник нокаут эвазига имкониятни бой берди.

"Табриклайман, Филип, ажойиб ғалаба! Мозес, бу ҳали ҳаммаси эмас. Кучлироқ бўлиб қайт ва олдинга интилишда давом эт. Сенинг йўлинг энди бошланяпти!", – дея украиналик боксчининг сўзларини келтиради The Ring нашри.

IBF чемпионлик камари Александр Усик июнь ойида расман бўшатган учта титул орасидаги охирги вакант камар эди. Украиналикнинг ўзи келаси йилнинг март ойида АҚШда америкалик Деонтей Уайлдер билан жанг ўтказишни режалаштирмоқда.