Усман Нурмагомедов: "Дубайдаги "қафас" кичкина, унинг қочадиган жойи йўқ"

Дэвис аввалроқ россиялик аралаш яккакураш устасининг зарба бериш техникаси барқарор эмаслиги, ўзи эса босим остида синаётгани ҳақида гапирганди.

"Дэвисни кучли зарбага эга жангчи деб бўлмайди. Ким уни яхши зарба бериш техникасига эга деб айтди? - дея савол билан юзланди Нурмагомедов MMA Junkie каналига берган интервьюсида. - У албатта, собиқ чемпионлар ва эски жангчилардан бир-иккитасини мағлуб этган, лекин очиғини айтсам, бу ғалабалар мени қойил қолдирмади...

Унинг зарба бериш техникасидан бошқа ҳеч нарсаси йўқ. Албатта, мен уни партерга ўтказаман. У нима қилади? Унинг режаси қандай бўлади? Александр Шаблий уни партерга туширди, у ўрнидан тура олмади ҳам. Аксарият рақиблари уни партерга ўтказади, у эса уларни шунчаки ушлаб турди. Шунчаки ўзини урдирмасликка ҳаракат қилади ва раунд тугашини кутади. Кейин яна қандайдир таэквондо усулларини кўрсатиб, октагон бўйлаб югуришни бошлайди. Аммо у Дубайдаги "қафас" кичкина эканини тушунмайди. Унинг қочадиган жойи қолмайди"

Эслатиб ўтамиз, Усман Нурмагомедов ва Элфи Дэвис ўртасидаги жанг 7 февраль куни БААнинг Дубай шаҳрида бўлиб ўтадиган PFL Championship Series 5 турнирининг асосий тўқнашувига айланади.